PLAYUNING ANGIN

Udan grejeh iki

Aku ngerti yen sliramu

Ra bakal bali

Wis suwe anggonmu ngumbara

Ana kutha nggoleki cahyaning mbulan

Lan lintang sing ora tau

Ndhelik rina lan wengi

Mangertia dene dununging

Lintangku ana sajroning rasa atimu

Sapa ta sak temene sing ditresnani

Pucuking bun lan sumilire angin

Linggih ana ing angen-angen

Sing dadi jantraning uripku

Kadya layangan pedhot

Melu playune angin,

Sing wis dadi pinesthi

http://www.panjebarsemangat.co.id

JLENTREHNA

Jlentrehna….

Apa sing kudu dingapura

Apa sing kudu digatekna

Apa sing kudu dipeksa

Jlentrehna…

Ora ana

Ora bisa

Ora kena

Jlentrehna…

Tulung

Aku pengin ngerti

Apa sajake sing bakal dadi kahanan?

Dhuh Gusti apa merga iki

Kudu ngerti apik eleke

Supaya ora sembrana nglakoni urip

Jlentrehna Gusti…

http://www.panjebarsemangat.co.id

NERUSAKE CITA-CITANE RA KARTINI

Sadurunge R.A Kartini lahir ing alam padhang iki

wanita tan ana ajine

urip ing ndonya kelunta-lunta kelara-lara

bebasan luwih aji uripe semut lan lemut

bisa nyawang endahing donya kanthi merdika

ana nanging nasibe kaum wanita rikala iku

kadi nasibe godhong garing kang rontog tumiba ing lemah

pating blesar pating blader kasasak amblasah

kapidak kailes kasampar katendhang sawayah-wayah

kadhang mumbul kabur katerak angin gedhe

godhong garing tan bisa suwala

nadyan awak rusak raga bengkah ajur mumur

tan kuwawa nulak kejeming jaman

mangkono lelakone kaum wanita dhek semana

Sadurunge R.A. Kartini lair ing bumi iki

jerit tangise kaum wanita nggeterna dhadha

tumetesing eluh panalangsa nelesi bantala

amarga kaum wanita kasrimpet kajiret adat pingitan

wanita tan kena nyawang ombyake jaman

wanita tan kena mlebu ing pawiyatan

wanita tan kena ngudi kapinteran

jalaran wanita amung mujudake menungsa asor

kang ringkih ala tan ana pigunane

malah rinasa kaum wanita tan pantes urip ing alam ndonya

mula tansah diundamana disiya-siya

yen perlu arep dipendhem urip-uripan

kaya tumindak kejem ing jaman jahiliyah

mangkono rekasane wanita nalika semana

Sawise R.A. Kartini lahir ing donya

putri Jepara iki wani nantang nylenthak adat pingitan

slirane banjur gumregah maju cancut taliwanda

rawe-rawe rantas malang-malang putung

Kartini merjuangake nasibe kaum wanita

Kartini nduweni cita-cita dhuwur lan mulya

ngoncati adat pingitan

nguculi rante wesi kang nggubel kaum putri

siji-siji rante wesi bisa diudhari

wanita nduweni hak kang padha klawan priya

pranyata wanita bisa

pranyata wanita bisa

pranyata wanita bisa

wanita bisa ngudi ilmu ngracik kapinteran

wanita bisa mlebu ing pawiyatan

wanita bisa manggul bedhil maju ing peperangan

wanita bisa mimpin negara apa pemerintahan

kanthi ora lali mring kodrate

minangka biyung pungukuhing bale wisma

Eman…R.A. Kartini enggal katimbalan Gusti

nalika perjuwangane durung tuntas sayekti

mula kaum wanita ing jaman puniki

kang kawentar lumebu ing era globalisasi

ayo enggal gumregah cancut taliwanda

ngadeg mlaku mlayu

ayo mabur dhuwur ing angkasa

ngranggeh lintang napak rembulan

nerusake cita-citane R.A. Kartini

http://www.panjebarsemangat.co.id

AJA NGAPUSI

Kahanan samangke ora ngilangake wektu semana

Banyu mili ora bakal bali

Panjalukku kabeh ora mesthi kedadeyan

Nelangsa ati iki

Sanadyan ndonya iki mangerteni

Ananging ati ora bisa ngapusi

Paninggalanmu marang kekancanku, ngalahi marang aku

Tuturmu marang wong tuwaku, hangapusi prajanjenmu

Pamirengmu marang tresnaku, katon kelangan panemu

Aja ngapusi!

Mreneya neng sampingku

Cekelen ati iki, tansah tangis kang mili-mili

Ananging

Aku mangerteni tangis iki ora ana ajine

Mreneya, dakrungokake kekarepanmu

Aku tansaya tresna sliramu sanadyanta lara kanggone atiku

Aja ngapusi!

Kandhakana tresnamu, atimu kanggo kekancanku

Lila krasa getih iki

Nanging aku ora bisa ngapusi

Tresnaku kanggo sliramu lila karo kekancanku

http://www.panjebarsemangat.co.id

KAMPANYE PEMILU

Ngadhepake pileg

Pating tremplek photone para caleg

Jare si dhadhap lan si waru

Photone caleg iku lucu-lucu

Ana sing bagus, aja-aja ambune prengus

Ana sing ayu, aja-aja tutuke mambu

Ana sing luwes, aja-aja mengko marahi mules

Ana sing lemu, aja-aja yen sidhang disambi turu

Ana sing mrengut, aja-aja yen sidhang mung gawe ribut

Si dhadhap lan si waru…..

Bingung milih sing bagus apa sing ayu

Wusanane mung bisa padha ngguyu

Ha..ha..ha..hi..hi..hi…hu..hu..hu

pancen lucu……

Ngadhepake pemilu

Bener kandhane si dhadhap lan si waru

Para caleg ngumbar esem ngumbar guyu

Ing sadhengah papan lan wanci

Ana ing alun-alun apa aneng panti

Ora awan ora bengi

Para caleg padha ngobral janji

Jare arep ngajak rakyat urip mukti

Wektu iki……

Para caleg golek simpati

Kabeh caleg padha ngaku paling mumpuni

Kabeh caleg padha janji ora arep korupsi

Kabeh caleg padha muni

ora arep mentingake dhiri pribadi

Kabeh caleg padha kandha

kepengin bakal mulyakake bangsa lan negara

Si dhadhap lan si waru padha ngguyu…ha ha ha hi hi hi

Jroning atine ana rasa sangga runggi

Iki tenan apa ngapusi…….?

Rakyat cilik ora butuh janji

Nanging…… butuh bukti…!

http://www.panjebarsemangat.co.id

ANGGERKU.....

Ngger,

Biyung nyuwun ngapura

Ora bisa dadi biyung kang sampurna

Ora bisa nglegakne atimu

Ngger,

Uripku kebak kaluputan

Ngiwa luput, nengen luput

Rumangsaku aku wis manut

Bangun turut karo sing jare winasis

Nanging nyatane isih tetep luput lan diluputne

Lara atine biyung, ngger

Kepengin crita wae,

Ora enek sing gelem krungu

Apa maneh sambat, mung arep digeguyu

Kabeh wis ora percaya karo biyung

Kabeh ki nyatane ngapusi

Nanging biyung isih tetep percaya, ngger

Mung siji sing ora bakal ngapusi

Gusti Kang Maha Agung

http://www.panjebarsemangat.co.id

MELATHI SUCI

Kala semana…..

Pedhut ireng nggembuleng peteng

Ngemuli jagade kaum wanita

Urip lelimengan jroning pingitan

Tan suwala ….tan bisa nduwa….

tanpa daya…..

Kabrandhat adat… kajiret singset tali tatanan

Kang mblenggu ati sing karep maju

miwah pepenginan necep seserepan

Kabeh gantha kang mumbul ing angkasa…

mung kandheg ing nala

kala semana….

Wis tumeka wahyaning mangsa kala

Selikur April sewu wolungatus pitungpuluh sanga

Kartini,…. kang pindha melathi suci

Mijil aneng madyaning taman sari

Thukul… subur kang sekar melathi

Ngambar arum gandane ngebeki bumi pertiwi

Luhuring budi kuncara ing manca nagri

Karana wis kuwawa miyak grumbul pepetenging putri

mbuncang pedhut lelimengan… ngrubuh tembok pingitan

Paring pepadhang…. paring sesulang… nyirnakake panandhang

marang kaume kang nandhang kacingkrangan

Kalane iki….

Ginelar jembar jagade wanita

tan prabeda lan wong priya

Maju bareng padha makarti

Mrih raharjaning nagri

Kalane iki……

Melathi suci kang sentosa ing budi

wis murud ing kasedan jati,

Agung labuh labete marang negari

Kinarya palupi tumrap para putri

http://www.panjebarsemangat.co.id