KESINGKUR

Sobat,

dhadhamu kang wis aking

jantungmu kang wis gosong

atimu kang wis arang kranjang

soroting mripatmu wis suwung

uripmu tansah diburu kasepen

kumampul ing pangarep-arep,

ambyar….

Bedhil gagaraning nyawamu jaman perang

Putung mung kari crita

Tinulis ing kertas lungset

wis angel diwaca

jenengmu kasaput ing jaman semrawut

Kowe kesingkur.

Kebulet ing gubelaning kadhuhkitan

Kumambang baita tanpa nakhoda

Sobat, kowe mung kari crita

http://www.panjebarsemangat.co.id/kesingkur